குக்கீஸ் குழந்தைகளுக்கு மிகப் பிடித்தமான ஸ்நாக் வகையாகும். குழந்தைகள் மட்டுமில்லாமல் பெரியவர்களும் குக்கீஸ் என்றால் விரும்பி சாப்பிடுவார்கள். இந்த குக்கிகளை வீட்டிலேயே நாம் சுலபமாக செய்ய முடியும். இந்த கிறிஸ்மஸ்க்கு ஸ்நாக்ஸ் ரெசிபியான இந்த பட்டர் குக்கியை நீங்கள் வீட்டில் செய்து பாருங்கள். வீட்டில் தான் செய்தீர்கள் என்று யாரும் நம்பவே மாட்டார்கள். அந்த அளவிற்கு சுவை நிறைந்ததாக இருக்கும்.
இந்த பட்டர் குக்கி செய்வதற்கு முதலில் ஒரு மிக்ஸி ஜாரில் 100 கிராம் அளவு சர்க்கரை சேர்த்து அதனை பொடியாக அரைத்து எடுத்துக் கொள்ள வேண்டும். இப்பொழுது ஒரு பவுலில் 150 கிராம் வெண்ணெய் சேர்க்கவும். இது உப்பு சேர்க்கப்படாத வெண்ணையாக இருக்க வேண்டும். அறை வெப்ப நிலையில் இதனை சேர்த்து நன்றாக அடித்துக் கொள்ள வேண்டும். வெண்ணை மென்மையாகும் வரை அடித்த பிறகு பொடியாக்கி வைத்திருக்கும் சர்க்கரையை சேர்த்து நன்றாக கலந்து கொள்ளவும். பிறகு ஒரு முட்டையின் மஞ்சள் கருவை மட்டும் சேர்த்து நன்கு கலந்து கொள்ளவும். இதனுடன் அரை டீஸ்பூன் அளவிற்கு வெண்ணிலா எசென்ஸ் சேர்த்து அனைத்தையும் கிளறி விடவும். இப்பொழுது இதற்கான மாவுகளை சேர்க்கலாம்.
கிறிஸ்மஸ்க்கு சூப்பரான ஸ்நாக்ஸ் ரெசிபி கலகலா செய்து அனைவரையும் அசத்துங்கள்…!
ஒன்றரை கப் அளவிற்கு மைதா மாவு, ஒரு டேபிள் ஸ்பூன் சோள மாவு, ஒரு சிட்டிகை உப்பு ஆகியவற்றை ஒரு சல்லடையில் சலித்து சேர்த்துக் கொள்ள வேண்டும். இதனை நன்றாக கலந்து விட வேண்டும். தேவைப்பட்டால் இரண்டு ஸ்பூன் அளவிற்கு பால் சேர்த்துக் கொள்ளலாம். அனைத்தும் ஒட்டாமல் சேர்ந்து வந்ததும் இதனை ஒரு பைப்பிங் பேக்கில் சேர்த்து விருப்பமான வடிவத்திற்கு குக்கிகளை செய்து கொள்ளவும். அவனை 175 டிகிரி செல்சியஸில் சில நிமிடங்கள் ப்ரீ ஹீட் செய்து கொள்ள வேண்டும். இப்பொழுது தயார் செய்து வைத்திருக்கும் குக்கிகளை வைத்து 14 நிமிடங்கள் கழித்து எடுத்தால் குக்கி தயாராகி இருக்கும். அவன் இல்லை என்றால் ஒரு கடாயை முன்கூட்டியே சூடு செய்து மிதமான தீயில் வைத்து ஒரு ஸ்டாண்டின் மேல் தயார் செய்து வைத்திருக்கும் குக்கிகளை தட்டில் வைத்து மூடி வைக்கவும். குக்கிகளின் ஓரம் நன்கு சிவந்து வந்ததும் அடுப்பை அணைத்து விடலாம். குக்கி ஆறியதும் எடுத்துப் பார்த்தால் மொறுமொறுப்பான பட்டர் குக்கி தயாராகி இருக்கும்.
